Cymru’n Un

O’n staff ymroddedig, ein cefnogwyr yma yng Nghymru ac ar draws y byd, ein clybiau proffesiynol i’n clybiau cymunedol a’r holl wirfoddolwyr sy’n rhedeg rygbi Cymru bob penwythnos o’r flwyddyn, ni yw ‘Cymru’n Un’.

Mae ein Strategaeth 2024/29 yn darparu cyfeiriad clir a fydd yn mynd â rygbi Cymru ar daith i ddyfodol ffyniannus, llewyrchus a chynaliadwy, gyda phob cam cysylltiedig wedi’i amlinellu’n fanwl. Byddwn yn cael ein harwain ganddi ac yn atebol i’w huchelgeisiau, ei nodau a’i hamcanion, sydd oll wedi’u hategu gan genhadaeth, gweledigaeth ac ymrwymiad i ‘weithio gyda’n gilydd i greu profiad a chyfleoedd rhagorol i bawb drwy ein gêm’.

Cefnogir y genhadaeth gyffredinol gan bedwar conglfaen strategol fel y cyflwynwyd ym mis Mehefin y llynedd.

1. Datblygu Clybiau a Thimau Cenedlaethol cystadleuol ysbrydoledig
2. Meithrin gêm gymunedol ffyniannus a chynaliadwy
3. Cyflymu datblygiad ecosystem rygbi menywod a merched
4. Dal dychymyg, ymgysylltu a thyfu ein cynulleidfa rygbi drwy frandiau, profiadau a naratif cadarnhaol.

Mae gan rygbi ddylanwad hynod arwyddocaol ar ddiwylliant Cymru, dyma ein camp genedlaethol; a  chyda hynny daw cyfrifoldeb aruthrol i adlewyrchu, parchu a dathlu ein diwylliant. Rydym yn credu yng ngrym cydweithio, a gyda’r meddylfryd hwn y gwnaethom gychwyn ar ein taith i wireddu strategaeth newydd ar gyfer rygbi Cymru. Mae strategaeth ‘Cymru’n Un’ wedi’i chreu gyda chymorth a chefnogaeth y Bwrdd Rygbi Proffesiynol a’n clybiau. Gwnaethom adeiladu’r weledigaeth hon gyda’n gilydd, a dyma sut y mae’n rhaid i ni symud ymlaen.

Mae hon yn ffordd newydd o weithio i ni ac mae’n ddyletswydd ar bawb i gydweithio er mwyn sicrhau llwyddiant, edrych ymlaen a gwireddu ein huchelgais ymhen pum mlynedd, datgloi potensial twf llawn y gêm ac yn y pen draw gyfrannu at gymdeithas iach, ffyniannus yng Nghymru.